«Семсер жүзіндегі серт» роман-трилогиясының үшінші томы «Рух» деп аталады.
Бұл томда жалпы қазақ елінің орыс отаршылдығына қарсы күресі және Кенесарының ұлы, мұрагері Сыздық сұлтанның сол күресті жалғастыруы баяндалады. Тарихта ұлт-азаттық көтерілістің бәрі сәтсіз аяқталғаны белгілі. Бірақ роман идеясы қазақ елінің ХХІ ғасыр қарсаңында тәуелсіздікке жетуі Абылай, Қасым, Кенесары, Сыздық, кешегі Алаш көсемдерінің жанкешті қайраткерлігінің арқасы екенін аңдатады.
Туындының өн бойы құрылымдық, көркемдік, стильдік оқшаулықтарға толы. Әсіресе рухты қозғайтын сол заманның қоғамдық-әлеуметтік оқиғалары, саяси әрі мінез-құлық құбылыстары шынайы және кестелі түрде көрсетіледі.
Бұл шығарма саяси иірімдерге бейімделген немесе бодандық қамытын киген заманның шығармасы емес. Ұлттық рухымыз бен намысымызды әйгілейтін, Тәуелсіздіктің төл туындысы.
Кең тынысты, ауқымы үлкен шығарма дербес сананың болмысын байқатады.